Annabelle at Wilma, nagkaayos na

Annabelle at Wilma, nagkaayos na
Jun Lalin

LOS ANGELES, CA. Pagkatapos ng ilang buwang hindi pagkakasundo nina Annabelle Rama at Wilma Galvante (executive vice-president for entertainment ng GMA 7), nagkabati na sila sa LAX (Los Angeles airport) noong Miyerkules nang gabi.
Magkasabay sa Philippine Airlines PR102 flight that day sina Ma’am Wilma at Richard Gutierrez (kasama ang kuyang si Rocky).
After almost an hour na paghihintay sa arrival area, nakita ko kaagad si Ma’am Wilma na nakalabas na. Kasama niya ang anak na si Clara (na production assistant dati sa Codename: Asero).
Nakita rin ni Eddie Gutierrez ang GMA 7-executive at lumapit kaagad dito ang mister ni Bisaya.
Konting kumustahan. Nabanggit ni Tita Wilma kay Tito Eddie na sayang at kinailangang i-give-up ng beteranong aktor ang role sana nito sa Luna Mystica.
“Hindi bale, bibigyan kita ng bago, action naman,” sey raw ni Ma’am Wilma kay Tito Eddie sabay hanap kay Bisaya.
“Nasaan si Annabelle, babatiin ko siya,” sabi raw ni Ma’am Wilma kay Tito Eddie at kaagad inituro ng beteranong aktor ang kanyang misis na nakaupo sa may waiting lounge dahil hindi pa kaya ni Bisaya ang nakatayo nang matagal.
Paglapit ni Ma’am Wilma kay Bisaya ay nag-kiss sila sa isa’t isa. Kinumusta ng GMA 7-executive ang kalagayan ng dating nakatampuhan.
Parang walang nangyaring problema sa kanila sa eksenang nakita ko.
Nag-dialogue pa si Bisaya na medyo hirap pa siya dahil sa kanyang operasyon. Si Ma’am Wilma naman ay nagsabing dapat kasi ay 45 days munang magpahinga ang Gutierrez matriach.
Sey ko sa dalawa, kailangang kunan ko sila ng picture.
“Kailangan may scoop photo ako ng pagbabati n’yo!” sey ko at parehong natawa sina Bisaya at Ma’am Wilma at saka nag-pose para sa aking camera.
Maya-maya ay lumapit si Mother Lily Monteverde sa dalawa at pinag-pose ko silang tatlo.
Masayang-masaya si Mother Lily sa pagbabati nina Bisaya at Ma’am Wilma.
“Ang saya-saya nilang tingnan. Ang ganda na bati-bati lahat. I’m so happy for them,” sey ni Mother Lily, na kasabay rin pala nina Tita Wilma at Richard sa nabanggit na PAL flight.
Si Tito Eddie ay nakatingin lang isang tabi kina Bisaya at Ma’am Wilma. Obvious na masaya rin ang mister ni Bisaya sa pagkakabati ng misis at ng isa sa big bosses ng Siyete.
After no’n ay lumapit na rin sina Raymond at Tita Mary Ann Opeña na tuwang-tuwa rin.
Maya-maya ay nagpaalam na si Ma’am Wilma at ihahatid na raw sila ng sundo nilang si Josh Andowitt (PR ng GMA Pinoy TV).
Pagdating sa arrival area nina Richard at Rocky Gutierrez ay natuwa sila nang malamang bati na ang kanilang mommy at si Ma’am Wilma.
Ang maganda kina Tito Eddie at sa ibang mga anak ni Bisaya (including Ruffa na taga-ABS-CBN), never silang nag-comment sa naging gap ng kanilang ina at ni Tita Wilma.
Gusto rin nila na maayos na ang gap sa pagitan ng dalawa, kaya nang ibalita ko ‘yon kay Ruffa ay nag-dialogue kaagad ang TV host/actress ng, “Salamat naman. That’s good news!”
Nang papunta na kami ni Bisaya sa terminal ng United Airlines para sa kanilang flight papuntang Las Vegas, Nevada ay ramdam ko sa boses ni Bisaya ang kasiyahan na nagkaayos sila ni Ma’am Wilma.
***
Para sa KChardees fans na naghihintay ng update sa second movie nina Richard Gutierrez at KC Concepcion, this time under GMA Films and Regal Entertainment, ang kuwento sa akin ni Bisaya, sa December 17 na sila magsisimulang mag-shooting.
Hanggang December 23 daw ang shooting nina Richard at KC at magpapahinga lang sila para sa Christmas.
Kukunan sa December 17 ang ilang eksena na gagamiting teaser ng pelikula na malamang na ikarga sa mga pelikula ng Regal Films na ipalalabas sa MMFF.
Sabi ng KChardees, nakahanda silang suportahan nang todo-todo ang second movie nina Richard at KC.
Willing ang KChardees na mag-set-up ng funds na gagamitin para magkaroon ng matinding awareness sa nabanggit na pelikula.
***