Gutierrez brothers, malungkot sa pagpanaw ni Marky

Gutierrez brothers, malungkot sa pagpanaw ni Marky
Jun Lalin

LAS VEGAS, NEVADA ­--- Sabado na nang magkita kami ni Annabelle Rama sa Palazzo Resort, Hotel and Casino.

Niyaya akong mag-lunch ni Bisaya sa Zine at kasama niya roon sina Tito Eddie, Mary Ann Opeña (kasama ang anak nitong si Jemel), Rachel Cruz (ground staff ng Philippine Airlines sa Los Angeles) at iba pa.

Pagkatapos kumain ay nagulat ako nang kunin ni Tito Eddie ang wheelchair sa isang tabi at doon suma­kay si Bisaya. Ang veteran actor ang nagtulak ng wheelchair ni Bisaya.

“Hindi ko kasi kayang lumakad nang lumakad. Buti na lang at mahal ako ng asawa ko at siya ang nagtutulak ng wheelchair,” sey ni Bisaya.
“Naku, kahapon si Richard ang nagtutulak ng wheelchair,” sey naman ni Tita Mary Ann.

Ang sweet tingnan nina Bisaya at Tito Eddie.

***

Bago ako umalis ng L.A. noong Biyernes ay tinawagan na ako ni Bisaya kaugnay ng mga pahayag ni Dr. Manny Calayan against her.

Pina-text sa akin ni Bisaya si Dr. Calayan ng, “Sinimulan mo ‘to, tatapusin ko!”
Nananahimik si Bisaya at sinimulan siya ni Dr. Calayan, kaya sasagutin niya ang mga pahayag nito laban sa kanya.

Nakausap ko si Dr. Calayan at naloka ako nang nag-deny siya samantalang maraming nakarinig sa mga pahayag niya laban kay Bisaya.

May dialogue pa si Dr. Calayan na sinabi raw niya na “Ok naman kami ni Tita” sa mga reporter na kausap niya sa L.A.

Dahil sa pinagsasasabi ni Dr. Calayan against Bisaya ay asahang magsasalita na siya kung ano talaga ang dahilan kaya umalis ang anak niyang si Ruffa Gutierrez bilang image model ng beauty clinic ng nasabing cosmetic surgeon.

***

Masaya si Raymond Gutierrez at ang mga kapatid niyang sina Richard, Rocky, Elvis at Ritchie Paul sa pagkakapanalo ni Manny Pacquiao sa boxing fight nila ni Oscar De La Hoya.

Pero ‘yung kasiyahan nila ay nahaluan ng lungkot nang makarating sa kanila ang balitang patay na si Marky Cielo.

Nakasama nina Richard, Rocky at Elvis si Marky sa Codename: Asero. Mabait daw talaga ang namayapang young actor.

Si Raymond ang host ng StarStruck 3 kung saan si Marky ang grand winner.
“I’m so sad. Marky’s so nice pa naman,” paha­yag ni Raymond.

Ako man ay nalungkot din nang ibalita ni Jhops Cruz ng GMA 7 ang pagkamatay ni Marky.

Lungkot na lungkot din ang mga taga-GMA 7, lalo na ang Lalola cast and staff.
Kasama sa cast ng Lalola si Marky bilang si Billy at kapareha ni Lovi Poe.
Sa mga naulila ni Marky, our condolences.

***

Pagkatapos ng bo­xing fight nina Manny Pacquiao at Oscar De La Hoya ay bumalik sa Pa­lazzo Hotel ang pamilya Gu­tierrez at doon sila nag-family dinner.
Kapagkuwan ay pumunta sila sa Mandalay Bay Hotel kung saan ay may after party para kay Pacquiao.

Wala sa after party ang Pambansang Kamao, kaya umakyat na lang si Annabelle Rama kasama ang mister na si Eddie Gutierrez at anak na si Raymond Gutierrez sa suite room ni Manny.

Kasama sina Manny at Jinkee at iba pang mga tao sa loob ng suite room ay pinanood nila ang replay ng boxing fight.

Maingay sa loob ng kuwarto kaya hindi kami gaanong magkarinigan ni Bisaya.
Hindi na raw sumama sa kanila sa suite room ni Manny si Richard dahil pagod na ang binata.

As you read this, pa­balik na sa Los Angeles, California ang pamilya Gutierrez.
Sa Biyernes ang alis nila ng L.A.