‘Lobo’ tinalo ng ‘Kamandag’

ni: Jun Lalin

Kagabi ginanap sa One Esplanade ang birthday celebration nina Richard at Raymond Gutierrez. Bale isinabay na rin doon ang taping ng TV special ni Richard, ang A Handsome Journey, kung saan ay nag-participate ang mga malalapit na kaibigan ng binata. Si Raymond ang host ng TV special na ‘yon. Kaabang-abang ang lie-detector test ni Richard at tama ba ang dinig ko na pati si Raymond ay sumalang sa lie-detector test at si Richard ang nagtanong sa kanya? Malamang na sa Linggo na ipalabas sa GMA 7 ang TV special ni Richard. Samantala, balik-taping para sa Kamandag si Richard sa araw na ito at papuntang Iloilo si Raymond para sa audition ng Pinoy Idol. Malamang na magkaroon ng selebrasyon sa taping ngayon ng Kamandag dahil panalo sila sa Lobo nina Angel Locsin at Piolo Pascual. Naka-33.1% sa ratings ang Kamandag at naka-27.7% ang series nina Angel at Piolo. Mas matindi ang kamandag ng ‘ahaserye’ ni Richard at tinalo nito ang bangis ng kalabang show. Panalo rin ang Zaido (28.9%) sa Kung Fu Kids (26.6%), at ang Marimar (36.8%) sa Palos (23.6%).